મુજ મનડામાં તું વસ્યો રે, જજ્યું કુસુમમાં વાસ;

અળગો ન રહે એક ઘડીરે, સાંભરે શ્વાસોશ્વાસ.||૧||

 

તુજશું રંગ લાગ્યો, રંગ લાગ્યો સાતે ધાત;

શ્રી જિનરાજ તુજશું રંગ લાગ્યો ત્રિભુવનનાથ.||૨||

 

શીતલ સ્વામી જે દિને રે, દીઠો તુમ દેદાર;

તે દિનથી મન માહરું રે, લાગ્યું તાહરી લાર.||૩||

 

મધુકર ચાહે માલતી રે, ચાહે ચન્દ્ર ચકોર;

તિમ મુજને પ્રભુ તાહરી રે, લાગી લગન અતિ જોર.||૪||

 

ભર્યા સરોવર ઊમટે રે, નદીયાં નીર ન માય;

તો પણ યાચે મેઘકું રે, જિમ ચાતક જગમાંય.||૫||

 

ઈમ જગમાં પ્રભુ તુમ વિના રે, મુજ મન નાવે રે કોય;

‘ઉદય’ વદે પદ સેવના રે, દીજે સન્મુખ જોય.||૬||