તું પ્રભુ મારો હું પ્રભુ તારો, ક્ષણ એક મુજને નાહિ વિસારો;

મહેર કરી મુજ વિનંતી સ્વીકારો,

સ્વામી સેવક જાણી નિહાળો. ।।૧ ।।

 

લાખ ચોરાશી ભટકી પ્રભુજી, આવ્યો હું તારે શરણે હો જિનજી;

દુર્ગતિ કાપો શિવસુખ આપો, ભક્ત સેવકને નિજપદ સ્થાપો. ।। ૨ ।

 

અક્ષય ખજાનો પ્રભુ તારો ભર્યો છે, આપો કૃપાળુ મેં હાથ ધર્યો છે;

વામાનંદન જગવંદન પ્યાર, દેવ અનેરા માંહે તુંહી જ ન્યારો. ।।૩।।

 

પલ પલ સમરું નાથ શંખેશ્વર, સમરથ તારણ તુંહી જિનેશ્વર;

પ્રાણ થકી તું અધિકો વહાલો, દયા કરી મુજને નેહે નિહાળો. ।।૪ ।।

 

તારું બિરુદ કેડ ન છોડું એમ લેજો જાણી;

ચરણોની સેવા નિત નિત ચાહું, ઘડી ઘડી મનમાંહે હું ઉમાહું. ॥૫।।

 

‘જ્ઞાનવિમલ’ તુજ ભક્તિ પ્રભાવે, ભવોભવનાં સંતાપ શમાવે;

અમીય ભરેલી તારી મૂરતિ નિહાળી,

પાપ અંતરના દેજો પખાળી. ।।૬।।