જગપતિ તું તો દેવાધિદેવ! દાસનો દાસ હું તાહરો;

જગપતિ તારક તું કિરતાર, મનમોહન પ્રભુ! માહરો.||૧||

 

જગપતિ તાહરે ભક્ત અનેક, માહરે એક જ તું ઘણી;

જગપતિ વીરમાં તું મહાવીર, મૂરતિ તાહરી સોહામણી.||૨||

 

જગપતિ ત્રિશલારાણીનો તું તનુ, ગંધાર બંદરે ગાજીઓ;

જગપતિ સિદ્ધારથ કુલ શણગાર, રાજરાજેશ્વર રાજિયો.||૩||

 

જગપતિ ભક્તોની ભાંગે તું ભીડ, પીડ પરાઈ પ્રભુ પારખે;

જગપતિ તુંહિ અગમ અપાર,

સમજ્યો ન જાએ મુજ સારિખે. ||૪ ||

 

ખંભાત જંબુસર સંઘ, ભગવંત ચોવીસમો ભેટિઓ;

જગપતિ “ઉદય’ નમે કર જોડ, સત્તર નેવું સમે કીઓ.||૫||