અંતરજામી સુણ અલવેસર, મહિમા ત્રિજગ તુમારો રે,

સાંભળીને આવ્યો હું તીરે, જન્મ મરણ દુઃખ વારો;

સેવક અરજ કરે છે રાજ, અમને શિવસુખ આપો,

આપો આપોને મહારાજ, અમને મોક્ષ સુખ આપો.||૧||

સહુકોનાં મનવાંછિત પૂરો, ચિંતા સહુની ચૂરો રે;

એહવું બિરુદ છે રાજ તુમારું, કેમ રાખો છો દૂરે.||૨||

સેવકને વલવલતો દેખી, મનમાં મહેર ન ધરશો રે;

કરુણાસાગર કેમ કહેવાશો, જો ઉપકાર ન કરશો.||૩|

લટપટનું હવે કામ નહીં છે, પ્રત્યક્ષ દરિસણ દીજે રે;

ધુમાડે નહીં સાહિબ, પેટ પડ્યાં પતીજે.||૪||

શ્રી શંખેશ્વર મંડન સાહિબ, વિનતડી અવધારો રે;

કહે ‘જિનહર્ષ’ મયા કરી મુજને, ભવસાગરથી તારો.||૫||