કરુણાસાગર જીવજીવન પ્રભુ વીરજી,

અનંતગુણના ધારક પ્રાણ આધાર જો;

મુજને મૂકી ભવ અટવીમાં એકલો,

આપ સિધાવ્યા મુક્તિપુરીમાં નાથ જો.||૧||

 

સિદ્ધ બુદ્ધ અવિનાશી પદના ભોગી છે,

હું છું પામર મોહજાળમાં મગ્ન જ;

નાથ નિહાળી આવ્યો શરણે આપના,

તાર તાર હો તારક દેવ દયાળ જો.||૨||

 

સમવસરણમાં બેસી અમીરસ વાણીથી,

જ્યારે કરતાં પ્રભુજી ભવિ ઉપકાર જો;

તે વેળા હું ભાગ્ય વિહુણો કઈ ગતિ,

ન પામ્યો ભવસાગરનો અંત જો.||૩||

 

જ્ઞાન અનંતું સુખ અનંતું તાહરું,

ક્ષાયિક ભાવે વર્તે છે તુજ ગુણ જો;

પણ હું પાપી રમણ કરું પરભાવમાં,

તો કેમ પામું સ્વરુપ રમણનું સુખ જે.||૪||

 

સિદ્ધારથ કુલ ચરમ પ્રભુ મહાવીરજી,

ત્રિશલા નંદન ત્રિજગવંદન નાથ જો;

મનમંદિરમાં આવો પ્યારા વીરજી,

વિણ સૂનો છે આ દરબાર જો.||૫||

 

અનેક જીવને તાર્યા તેં કરુણાનિધિ,

તો શું મુજને મૂકી જશો ભગવાન જો;

મનોહર મુદ્રા જોવા તલસે તાહરી,

“ઉદયરત્ન’ કહે ઘો દરિશણ મહારાજ જે.||૬||