નેમજી રે….. તોરણે આવી આમ પાછા ન જવાય;

કુંવારી કન્યા રાણી રાજુલ કહેવાય (૨)

પ્રભુ ગુણ ગાય, સામે જ જવાય…||૧ ||

 

આઠ ભવોની પ્રીતલડી, નવમે ભવે ના છોડાય (૨);

બાળબ્રહ્મચારી રાજુલ બાળા, વીનવે નેમજીને પાય (૨);

નેમજી રે… પાછા વળીને આજ ગ્રહો મારો હાથ.॥२॥

 

પશુઓનો પોકાર સુણીને, રથને પાછો વાળ્યો (૨);

ધ્રુસકે રુવે રાજુલ રાણી, ધરતી પટે ઢળાણી (૨);

નેમજી રે… પાછા વળીને તિહાં દીધું વરસીદાન.||૩||

 

પંચાવન મેં દિન પ્રભુજી, પામ્યા કેવળજ્ઞાન (૨);

વધામણી રાજુલબાળા, નેમજીને શરણે જાય (૨);

નેમજી રે… દીક્ષા આપી કર્મ ખપાવી ભવોભવ તારી કહેવાય. ।।૪।।

 

કેવળ કલ્યાણક જે કોઈ ગાશે, લેશે મુક્તિના રાજ (૨);

નેમજી પહેલાં, પહોંચ્યા રાજુલ, મુક્તિના માર્ગે જાય (૨);

નેમજી રે હીરવિજય ગુરુ હીરલો ને “વીરવિજય’ ગુણગાય. ।।૫।।