સુવિધિ જિણંદ મુજ દરિસણ દ્યોને, દિલભર દિલથી મારા સામું જુઓ.

હસી તારા ચિત્તની વાત મને કહોને,

પ્રીતની રીતમાં શું તેં વહોને.||૧||

 

અંતર ચિત્તની વારતા રે, પ્રભુ કહું તે ચિત્તમાં ધરોને;

પ્રીત પ્રતીત જિમ ઊપજે રે, તિમ અવિહડ પ્રીત કરોને.||૨||

 

સુંદર તુમ મુખ મટકડે રે, પ્રભુ! લોભાવ્યા તેં અમને;

મુજ મન મળવા અતિ ઘણું રે, ચાહે ક્ષણ માંહી તુજને.||૩||

 

લલચાવશો દિન કેટલા રે, ઈમ મુજને દિલાસો દઈને;

હા ના ભાખીએ રે, બેસી શું રહ્યા મૌન લઈને.||૪||

 

હસિત વદને બોલાવીને રે, આજ મુજને રાજી કરોને;

વાંછિત દેઈ અમને રે, તુમે જગમાં સુજશ વરોને.||૫||

 

રોગ શોગ દુઃખ દોહગ રે, પાપ સંતાપ ને તાપ હરીને;

પંડિત પ્રેમના “ભાણ”ને રે, તુમે પ્રસન્ન હોજો હેજ ધરીને.||૬||