વાસુપૂજ્ય વિલાસી, ચંપાના વાસી,

પૂરો અમારી આશ.. કરું પૂજા હું ખાસી, કેસર ઘાસી,

પુષ્પ સુવાસી, પૂરો અમારી આશ… વાસુપૂજ્ય વિલાસી… (૧)

પૂર્વ ભવે પદ્મકર રાજા, વૈરાગ્ય રંગ અપાર;

રાજ પાટ વૈભવને છોડી, લીધો સંયમ ભાર;

વીશ-સ્થાનક સાધી, જિનપદ બાંધી, સુરગતિ પામી,

પૂરો અમારી આશ… વાસુપૂજ્ય વિલાસી… (૨)

પાંચ કલ્યાણક ચંપાપુરીમાં,

કલ્યાણના કરનાર; મોક્ષમાર્ગ ઉપદેશી પ્રભુજી,

પહોંચ્યા મોક્ષ મોઝાર; એ અંતર્યામી, ત્રિભુવન સ્વામી,

શિવગતિગામી, પૂરો અમારી આશ… વાસુપૂજ્ય વિલાસી… (૩)

ચૈત્યવંદન કરું ચિત્તથી પ્રભુજી,

ગાઉ ગીત રસાળ; એમ પૂજા કરી વિનંતી કરું છું,

આપો મોક્ષ વિશાળ; દિયો કર્મને ફાંસી, કાઢો કુવાસી,

જેમ જાય નાસી, પૂરો અમારી આશ.. વાસુપૂજ્ય વિલાસી… (૪)

આ સંસાર છે ઘોર મહોદધિ, કાઢો અમને બહાર;

સ્વારથના સૌ કોઈ સગા છે, માતા-પિતા પરિવાર;

બાળમિત્ર ઉલ્લાસી, વિજય વિલાસી,

અરજી ખાસી, પૂરો અમારી આશ.. વાસુપૂજ્ય વિલાસી… (૫)